Leiðsögumaður með áherslu á jöklaleiðsögn

60 eininga grunnnám í fjallamennsku

Opið fyrir umsóknir skólaárið 2026-2027 út 31. apríl

Sækja um
Búnaður
Dagatal

Fyrsta árið við Fjallaskóla Íslands er 60 einingar og leggur áherslu á jöklaleiðsögn. Námið styrkir nemendur á öllum sviðum fjallamennsku og undirbýr nemendur fyrir jökla- og gönguleiðsögn.  Námið er hugsað sem fyrsta skref í átt að fjallamennsku og leiðsögn sem hægt er að byggja ofan á. Nemendur öðlast mikla reynslu í ferðalögum í fjalllendi og á jöklum.

Nemendur sem ljúka náminu öðlast réttindin Jöklaleiðsögn 1 frá félagi fjallaleiðsögumanna á Íslandi (AIMG), réttindi í fyrstu hjálp frá Landsbjörgu auk námskeiða í fjallamennsku, klifri, snjóflóðafræðum, vetrarferðamennsku, fjallaskíðamennsku, hájöklaferðamennsku og fleiru.

Námið samanstendur af verklegum vettvangsáföngum, sem eru 4-7 dagar í senn og bóklegu fjarnámi. 

Hægt er að taka námið á tveimur eða fjörum önnum. Nemendum sem taka námið samhliða vinnu eða öðru námi er ráðlagt að taka námið á fjórum önnum. Nemendur sem taka námið á 2 önnum samhliða vinnu, verða að hafa mikinn sveigjanleika í vinnu og tíma til að sinna námi.

Í flestum vettvangsferðum skólans er lagt upp með það að nemendur gisti í tjöldum. Innifalið í skólagjöldunum er aðgangur að tjöldum sem notast er við í sumum ferðum. Í einstaka tilfellum þurfa nemendur að bóka gistingu inni og greiða fyrir það sjálfir.

Vettvangsáfangar í náminu eru 14, af þeim eru fjórir val- áfangar þar sem nemendur velja tvo af fjórum áföngum. Vettvangsáfangar eru kenndir úti í náttúru Íslands á 4 – 7 dögum. Eftir eðli áfanganna sem og árstíma, er gist í tjöldum eða í gistingu sem nemendur sjá um að skipuleggja sjálfir. 
 

Verklegir skylduáfangar eru:

  • Klettar og línuvinna (7 dagar)
  • Rötun og útivist (7 dagar)
  • Jöklaferð (5 dagar)
  • Fyrsta hjálp (4 dagar)
  • Snjóflóðagrunnur og skíðamennska (5 dagar)
  • Vetrarferðamennska (6 dagar)
  • Jöklaleiðsögn 1 (4 dagar)
  • Hájöklaferð (6 dagar)
  • Lokaferð (7 dagar)

Verklegir valáfangar eru: 

  • Fjallahjól (4 dagar)
  • Sjókajak (4 dagar)
  • Fjallaskíðagrunnur (4 dagar)
  • Klettaklifur (4 dagar)

Bóklegir áfangar eru kenndir í fjarnámi samhliða verklegu námi.

Bóklegir áfangar eru:

  • Fjallaferðir og skipulag
  • Hagnýt veður- og jöklafræði
  • Fjallaferðir og hópastjórnun
  • Þjálfun og heilsa leiðsögumanna

Kostnaður við námið er 400.000 kr. á önn //  800.000 kr. fyrir árið. 
Ef sótt er um hálft nám greiðast 240.000 kr. fyrir hverja önn.

Námið er lánshæft.
Nemendur greiða sjálfir fyrir ferðakostnað, gistingu og uppihald á meðan á námskeiðum stendur.

Nemendur þurfa einnig að eiga persónulegan búnað og ef nemendur eiga ekki þann búnað sem ætlast er til að þeir eigi getur verið auka kostnaður fyrir nemendur að koma sér upp búnaði, sjá meira um það undir búnaður hér á síðunni.

Skilyrði fyrir því að hefja nám í leiðsögn með áherslu á jöklaleiðsögn eru:

  • Að hafa lokið stúdentsprófi, sveinsprófi eða öðru sambærilegu námi. Próf í frumgreinadeildum háskóla teljast sambærileg stúdentsprófi. Umsækjendur sem náð hafa 18 ára aldri og eru án formlegrar menntunar en hafa starfað í ferðaþjónustu við fjallamennsku geta óskað eftir undanþágu frá inntökuskilyrðum.
Að auki þarf nemandi:
  • Að geta stundað nám í krefjandi aðstæðum og landslagi
  • Að vera í góðu líkamlegu formi

Nemendur þurfa að eiga persónulegan búnað og lista yfir þann búnað er hægt að finna hér á síðunni undir „Búnaður“. Skólinn útvegar tæknilegan búnað, svo sem tjöld, jökla- og klifurbúnað. Nemendur er þó hvattir til að kaupa persónulegan sérhæfðan búnað meðan á námi stendur.