Leiðsögumaður með áherslu á Fjallgönguleiðsögn
Annað árið við Fjallaskóla Íslands er námsleiðin leiðsögumaður með áherslu á fjallgönguleiðsögn. Námið 60 eininga sérhæft nám í fjallamennsku og leiðsögn á hájöklum og víðar og fer fram yfir tvær annir.
Námið er ætlað sem framhald af námsleiðinni leiðsögumaður með áherslu á jöklaleiðsögn og er ætlað að dýpka þekkingu nemenda frá fyrra árinu. Lögð er áhersla á öryggi og að nemendur öðlist færni til þess að leiða fólk um fjöll á öruggan hátt.
Hluti af náminu eru krefjandi réttindanámskeið í bland við almenn námskeið í leiðsögn á vegum skólans.
Réttindanámskeið eru:
- AIMG Fjallgönguleiðsögn 1
- Vettvangshjálp í Óbyggðum (Landsbjörg)
- nemendum stendur einnig til boða að taka AIMG Jöklaleiðsögn 2
- Landvarðaréttindi frá Náttúruverndarstofnun
- Hájöklaferðamennska 2
- Leiðangur yfir Vatnajökul
- Ísklifur
- Fjallaskíðamennska 2
- Snjóflóðafræði og leiðsögn (framhaldsnámskeið)
- Framhaldsnámskeið í klettaklifri
- Skiptinám erlendis
Námið samanstendur að mestu leyti af verklegum vettvangsáföngum, sem eru 4-7 dagar í senn, en einnig bóklegu fjarnámi. Námið er kennt á tveimur önnum.
Sjá dagatal náms í fjallgönguleiðsögn.
Skilyrði fyrir því að hefja nám í leiðsögn með áherslu á fjallgönguleiðsögn:
- Að hafa lokið námskeiðinni leiðsögumaður með áherslu á jöklaleiðsögn.
- Að hafa lokið stúdentsprófi, sveinsprófi eða öðru sambærilegu námi. Próf í frumgreinadeildum háskóla teljast sambærileg stúdentsprófi. Umsækjendur sem náð hafa 18 ára aldri og eru án formlegrar menntunar en hafa starfað í ferðaþjónustu við fjallamennsku geta óskað eftir undanþágu frá inntökuskilyrðum.
Námið veitir nemendum réttindi innan Félags fjallaleiðsögumanna á Íslandi (AIMG). Nemendur ljúka AIMG fjallgönguleiðsögn 1 og einnig geta nemendur tekið valáfangan AIMG jöklaleiðsögn 2 (ekki skylduáfangi). Einnig fara nemendur á námskeiðið Vettvangs hjálp í óbyggðum (e.Wilderness first responder).
Nemendur þurfa að eiga persónulegan búnað og lista yfir þann búnað er hægt að finna hér á síðunni undir „Búnaður“. Skólinn útvegar tæknilegan búnað, svo sem tjöld, jökla- og klifurbúnað. Nemendur er þó hvattir til að kaupa persónulegan sérhæfðan búnað meðan á námi stendur.
Í flestum vettvangsferðum skólans er lagt upp með það að nemendur gisti í tjöldum. Innifalið í skólagjöldum skólans er aðgangur að tjöldum. Í einstaka tilfellum munum við biðja nemendur að bóka gistingu inni eða í sameiginlegum skálum eða t.d. hosteli eða slíkt og þá greiða nemendur fyrir það sjálfir.
Skólagjöld eru 750.000 kr fyrir árið eða 350.000 kr á önn.
Ef gist er í gistirými standa nemendur sjálfir undir þeim kostnaði sem og öllum kostnaði við akstur og fæði meðan á vettvangsferðum stendur.
Nemendur þurfa einnig að eiga persónulegan búnað og ef nemendur eiga ekki þann búnað sem ætlast er til að þeir eigi getur verið auka kostnaður fyrir nemendur að koma sér upp búnaði, sjá meira um það undir búnaðurhér á síðunni.