Áfangar náms í Jöklaleiðsögn
Vettvangsáfangar í náminu eru 14, af þeim eru fjórir val áfangar þar sem nemendur velja tvo af fjórum áföngum. Vettvangsáfangar eru kenndir úti í náttúru Íslands á 4 – 7 dögum. Eftir eðli áfanganna sem og árstíma, er gist í tjöldum eða í gistingu sem nemendur sjá um að skipuleggja sjálfir. Bóklegir áfangar eru fjórir og eru kenndir í fjarnámi.
Í áfanganum klettaklifur og línuvinna er lögð áhersla á nauðsynlegan grunn í línuvinnu til að stunda klettaklifur utandyra. Þá er almennri línuvinnu blandað við klettaklifrið, s.s. sig, línuklifur, bygging akkera og meðhöndlun sérhæfðs klifurbúnaðar. Námið er vettvangsnám þar sem farið er í ferðir úti í náttúrunni þar sem tekist er á við raunaðstæður. Áhersla er lögð á öryggisatriði og fagleg vinnubrögð ásamt virðingu fyrir félögum og náttúru. Námið fer fram á Suðausturlandi á klettaklifursvæði. Gert er ráð fyrir útivist og líkamlegum æfingum alla daga.
Í áfanganum rötun og útivist er lögð áhersla á skipulag og undirbúning gönguferða í óbyggðum, notkun rötunartækja, gerð leiðarkorta, útbúnað til bakpokaferða, leiðsögn, tjaldbúðalíf og að ferðast án ummerkja (e. leave no trace). Námið er vettvangsnám þar sem farið er í lengri gönguferð með allt á bakinu í óbyggðum og tekist á við raunaðstæður. Áhersla er á mikilvægi tíma- og hópastjórnunar. Náttúrutúlkun er einnig áhersluatriði og að nemendur miðli þekkingu sinni af umhverfinu til hópsins.
Áfanginn Skriðjöklar, fer fram á skriðjöklum á Suðausturlandi. Megináherslan er á ferðalög á skriðjöklum ásamt tilheyrandi tæknilegri línuvinnu. Þar má nefna byggingu akkera í ís, sig og línuklifur, hífingar og sprungubjörgun. Í áfanganum þjálfast nemendur einnig í ísklifri og broddafærni í krefjandi landslagi. Áfanginn miðar að því að undirbúa nemendur fyrir ferðir á eigin vegum í hópi jafningja á skriðjökla. Námið er vettvangsnám þar sem farið er í ferðir úti í náttúrunni þar sem tekist er á við raunaðstæður.
Áfanginn Kajaksiglingar fer fram á sjókajak og miðar að því að þjálfa nemendur í ferðalögum á kajak í miðmunandi umhverfi. Nemandi þjálfast í að taka ákvarðanir miðað við eigið líkamsástand, staðhætti og aðstæður. Nemendur þjálfast í að nota öryggisbúnað í kajakferðum og útbúa raunhæfar ferðaáætlanir fyrir styttri kajakferðir.
Áfanginn Snjóflóðagrunnur og skíðamennska er fimm daga námskeið sem fer fram á Tröllaskaga og byggir breiðan sterkan grunn í snjóflóðafræðum. Farið er yfir öll grunnhugtök snjóflóðafræða, hvernig landslag hefur áhrif á snjóflóðahættu, hvernig má nýta snjóflóða- og veðurspár til þess að undirbúa fjallaferðir, félagabjörgun úr snjóflóði, hvernig mannlegi þátturinn hefur áhrif á ákvarðanatöku fólks í krefjandi aðstæðum og alhliða skipulag fjallaferða með tilliti til áhættuþátta í fjalllendi að vetrarlagi.
Auk snjóflóðafræðanna fer fram skíðakennsla en námskeiðið fer fram á skíðasvæði þar sem nemendur fá tækifæri til þess að bæta skíðatækni sína innan og utan brauta undir handleiðslu kennara.
Þetta skemmtilega valnámskið byggir ofan á grunninn sem fenginn var á snjóflóðanámskeiðinu og nýta nemendur sér þá þekkingu til þess að skipuleggja ferðir og fara á fjallaskíði. Nemendur læra uppgöngutækni, leiðarval, landslagslestur og mat á hættu í snjóflóðalandslagi.
Nemendur byggja sterkan grunn í fjallaskíðamennsku og öðlast tæki og tól til þess að færa fjallaskíðamennskuna á næsta stig.
AIMG jöklaleiðsögn 1 er fjögurra daga námskeið og mat sem fer fram á skriðjöklum á Suðausturlandi. Farið er yfir helstu atriði jöklaleiðsagnar svo sem leiðarval, sprungubjörgun, ísklifur, samskipti við gesti, náttúrutúlkun og hópstjórn.
Standist nemandi námskeiðið hefur hann réttindi til að starfa undir merkjum AIMG á skriðjökli sem AIMG Jöklaleiðsögunemi (e. AIMG glacier guide trainee) að sumarlagi.
Í áfanganum er farið yfir grunn í hájöklaferðamennsku en áfanginn fer fram í fjölbreyttu fjallalandslagi. Farið er yfir helstu atriði hájöklaferða; leiðarval, gerð leiðarkorta, rötun, félagabjörgun úr sprungu, uppsetningu á línu til göngu, fjarskipti og hópstjórn. Lögð er áhersla á meðvitund og virkar umræður um snjóaðstæður. Þá er tjaldlíf í snjó þjálfað með tveggja til þriggja nátta ferð í raunaðstæður þar sem atriði eins og skjólveggir, tjaldgryfja, eldamennska, svefn, fyrirkomulag og samstarf í tjaldbúðum er þjálfað. Áfanginn miðar að því að þjálfa nemendur í að ferðast í hópi jafningja á hájöklum.
Áfanginn lokaferð er lokapróf í leiðsögn. Nemendur leiða gesti í fjögurra daga gönguferð um óbyggðir og bera þeir ábyrgð á öllu skipulagi, samskipti við gesti og leiðsögn. Nemendur leiða einnig samnemendur og kennara í hájöklalandslagi og sýna tæknilega færni á skriðjökli eða í klettaklifri. Áfanginn miðar að því að snerta á öllum kennsluatriðum námsbrautarinnar en þau eru rötun, öryggi á fjöllum, tjaldlíf, samskipti við gesti, náttúrutúlkun og tæknileg línuvinna.
Haustönn | |
| Áfangi | Lýsandi heiti |
| FJSK4JÖ06 | Fjallaferðir og skipulag (bóklegt) |
| FYHJ4LB01 | Fyrsta hjálp grunnur |
| FYHJ4FF01 | Fyrsta hjálp framhald |
| RÖÚT3JÖ05 | Rötun og útivist |
| SKJÖ4JÖ03 | Skriðjöklar |
| VEJÖ3JÖ05 | Hagnýt veður- og jöklafræði (bóklegt) |
| KLÍN3JÖ05 | Klettar og línuvinna |
| FHJÓ4JÖ02 | Fjallahjólreiðar (val) |
| KASI4JÖ02 | Kajaksiglingar (val) |
Vorönn | |
| Áfangi | Lýsandi heiti |
| ÞJHE4JÖ02 | Þjálfun og heilsa fyrir leiðsögumenn (bóklegt) |
| VEFM4JÖ04 | Vetrarferðamennska |
| SNJÓ4JÖ03 | Snjóflóðagrunnur og skíðamennska |
| HÁJÖ4JÖ04 | Hájöklaferðamennska I |
| FJHÓ4JÖ05 | Fjallaferðir og hópastjórnun (bóklegt) |
| AIMR4JÖ03 | AIMG jöklaleiðsögn 1 |
| FJAM4JÖ05 | Lokaferð |
| KLIF4JÖ02 | Klettaklifur (val) |
| SKÍG4JÖ02 | Grunnur í fjallaskíðamennsku (val) |